Haere Mai - Welcome to the Ngati Hine Forestry Trust

Ko te mea tuatahi me whakamoemiti ki to tatou Matua-nui-i-te-rangi mo ona manaakitanga ki runga i a tatou katoa mai i te moemoeatanga, puta atu ki te puawaitanga, tae noa ki te whakakaupapatanga o tenei moemoea ara, ko nga ngahere a Ngati Hine. Na reira, me whakawhetai, me whakamoemiti i tona ingoa tapu i te mea i kauparea nga mea he ki te taha, ko nga mea pai i waihotia mai kia tutuki ai he painga mo te nuinga.

E te iwi whanui o Ngati Hine, tena ra koutou katoa. Tena ra koutou e noho mai na i enei kainga o tatou. Ko tenei te whakamihi atu ki a koutou katoa e uru mai ana ki te hononga rorohiko kia whiwhi ai nga rongo hou e pa ana ki nga ngahere o Ngati Hine. Na reira nau mai, piki mai, whakatau mai. Whakatau mai ki roto i tenei whare ki te kimi i nga mohiotanga me nga ahuatanga hou o te Ngahere o Ngati Hine.

Haere mai, pikauhia mai nga tini mate o tena, o tena o nga pito o te motu, kia whakahuihuia ki o matou; kia tangihia, kia mihia, kia poroporoakitia. Na reira e nga mate haere. Haere ki te po nui, ki te po tangotango, ki te po e u ai te moe. Na reira haere, haere, haere.

Kati ra e te whanau. Ko te tumanako hoki kia pai ai tou haerere i roto i tenei whare, ki te rapu, ki te kimi i enei ahuatanga katoa e pa ana ki o tatou ngahere. Ma Ihowa koutou e manaaki, mana koutou e tiaki kia roa ai ou ra ki runga i te mata o te whenua.

Kia ora.